GUIHANDOM KO IKAW O ALORAN - PART 1 by: Cocoy Salabas Bongalo

Gibati ka ba diay sa tumang kamingaw? saksi sa tumang kabugnaw, sa tumang kainit, sa tumang kagubot ug kahadlok sa lugar nga imong gilangyawan sa laing suok ning kalibutan? Aloranon, sama ka ba sa singgam sa Maular nga gisiki ug nibuhagay ug gisiklot? Tungod sa iyonay nimong talibi nga maoy nakapadasig sa imong gituohang kalampusan o kahayag sa imong mga damgo sa kaugmaon sa kinabuhi nga kinahanglan gyud molangyaw? Nga miresulta diay sa imong pagka masulob-on? Pakyas ang mga saad. O Aloran, daghan ka og sinultihan nga dili masabtan sa ubang lugar, mao bay timailhan o nakapalambigit sa imong tinuod nga pagka Aloranon? Nagpaila ka bang Aloranon tungod sa imong inunlan nga didto gilubong? O hamiling katilingbang Aloranon, sa imong paglangyaw hara ka na ba sa kabuntagon? Prinsipe ka na ba sa kagabhion? O bitoon ka ba sa kalangitan nga midan-ag nga nagpakitag kahayag sa dalan sa maayo untang kalampusan sa kaugmaon nimo sa Aloran? Panahon nga lumalabay lamang nga daw ang katuyoan takolahaw nahanaw lang ang tanan? Kay sa tinuod lang, wala na kay maulian. Nagbag-o na ang tanan, dili na nimo madungog ang sulog sa suba sa Dao ilang Silay ug Ambrosio ngadto sa Prinza ug Tonggo. Wala nay misunod nga musikero, wala nay lanog nga buto sa berso sa Aglipay ug Romano. Nabag-o na ang henerasyon, wala nay harana, wala nay nakagusto kang Eddie Peregrina ug "Memories of our Dream", Victor Wood ug "Eternally", ug ang 'picking' sa "Faithful Love". Kamatuoran sa mga milangyaw, dili kalikayan sa paghisgot sa panahon sa pagtapoktapok, ang paghinumdum sa kagahapon diin tam-is diay handumon. Magpabiling kasingkasing Aloranon, Cocoy Salabas Bongalo