BAHALA NA by: Cocoy Salabas Bongalo

O Espiritu sa BAHALA, ikaw naghunghong sa daghan namong Aloranon sa pagpangutang sa silingan ug kaparyentehan, o pagbaligya ug kabutangan sa among ginikanan, aron lang asikasohon ang mga papeles nga gikinahanglan sa lugar nga among gusto adtoan. Kusog ang imong singgit sa dughan sa pag-ingon.. BAHALA NA kung unsay among madangatan. O gahum ni BAHALA, katawhan kanimo naghangyo makalangyaw man lang, nanaad nga ikaw balikan ug halaran, sa dugay namong pangandoy imong gihatagan, mga damgong natuman sa imong tabang. Ginikanan nagbilin kang Inday nga ang kaputli ampingan kung moadto siya sa Singapore, Hongkong, Japan o Kamusliman, kay ang gi rekomendar Europe o England man, aron dali ra mabayran ang utang ug malukat na ang gi prendang basakan. Hahaha! O BAHALA, gipakita nimo ang paglaom, sobrang kalipay among naangkon sa layong dapit nga among gipuy-an karon. Saksi usab ang mga silingan sa pagbarog sa maanindot nga mga puloy-anan diha sa Aloran nga gibilin sa mga ginikanan. Aloran, daku na ang kausaban..daghan na ang lumulopyo sa Macawa, Barra, Lubogon, Tampi, Tawi-tawi, Balaring, Conat, ug Tuburan. Maayo na ang karsada sa Laguerta, Caputol, Labo, Calubi, Makubon, Burgos ug Mitazan. Ingon si Toto Mutia, nasug-an na ang Talingting, Nabuna, Toril, Manamong, Monterico, Roxas ug Sinampongan. Daghan nang nindot nga mga balay sa Mohon, Banisilon, Casusan, Calzada Mayor, Dullan, Palayan, Ibabao, Dalisay, Lawaan, Maular, Zamora, Pelong ug Culpan. Aloranon nga misalig ni BAHALA, ang tumong mutabok ngadto sa yutang Amerikanhon, nabag-o ang tanan kay naminyo man siya sa dayuhan. Dili na niya matuman ang gisaad niyang balikan ug iya nang giyam-iran ang lugar iyang gigikanan kay ang iyang kapikas dili man naangayan ang iyang yutang natawhan. O BAHALA, among nasayran nga ang bahandi lumalabay lamang. Natilawan na namo ang tanang lami ning kalibutan.. gikan sa sud-an, nindot nga sakyanan ug puloy-anan ngadto sa lugar nga puno sa kahilayan. Apan luyo aning tanan nga natilawan, gibati gihapon namo ang kakulang. O BAHALA, kamingaw nga dili malikayan diha sa lugar nga amo karong gipuy-an, tugoti kami manaad sa pagbalos sa kaayohan, kay gisalig na namo kang BATHALA SA KAHITAS-AN, ug nagtoo kami nga IYANG paga giyahan sa positibong panan-aw sa kahimtang ning kalibutan. Pahinungod alang sa mga Aloranong langyaw. Salamat sa akong kapikas nga si Dr.Felirin Jalipa Bongalo sa pagtabang ug han-ay niini. Nagpabiling kasingkasing Aloranon, Cocoy Salabas Bongalo