GUIHANDOM KO IKAW O ALORAN - PART 2 by: Cocoy Salabas Bongalo

Kamingaw nga dili mapugngan, lugar sa akong natawhan, nga puno ako sa kasinatian, mga higala, silingan ug kaparyentehan. Paghandom walay gisukdan, timaan sa gugmang gimingaw. Aloran nga dili na puede yam-iran kay daghan nang mga kabag-ohan, lagpad na mga kadalanan, hayag na mga agianan. Atbang sa daang munisipyo, naa nay gatugtog nga kombo. Pwesto sa kahoy nga mabolo, nahimo nang estasyon sa bombero, duol sa pulis departamento. Merkado temporaryong gibalhin duol sa sementeryo, kay utrohon nga naa nay terminal sa mga sakyanan de pasahero. Among eskwelahan sa grade 4 ni Ma'am Medado, nahimo nang bag-ong munisipyo. Mas daghan nang seksi nga empleyado sa gobyerno kay sa una halos mga barako. Suba sa Toril sa turismo gipasigarbo, baybayon wala na kaayo baroto kay gipanglabat na sa mga tag-iya tungod sa ilang negosyo. Maligo ka sa dagat naa nay presyo, dili parehas kaniadto nga ikaw maka deretso manginhas, mamana ug mangbubu. Pista ingbalik na sama sa una, nga kada balay magtinawo aron ang mga bisita dili mapasmo. Kay naa man gihapon ang torta, ibos ug adobo, pansit, kaldereta ug sampayna, ug ang pinaka lami bas-oy, kilawin, sinugbang baboy ug halang-halang linat-ang kabaw. Mayor Insek nga maabtikon, daghan na ika-pasigarbo kay nautro nya ang lungsod sa iyang termino, naningkamot makakuha og pondo sa mga politikong magpaboto. Mayor nga respetado, sa iya ang lungsod miasenso, garbo sa Aloranon naka mayor og batan-on, serbisyong madasigon, mga katawhan malipayon. Aloranon malaumon, kalinaw magpadayon... Mga damgong tumanon alang sa kaugmaon sa mga batan-on. Salamat sa patron San Mateo, gituohan matinabangon ug ang Ginoo magpadayon sa pag patuman sa iyang grasya kanato ipa-angkon. Magpabiling kasingkasing Aloranon, Cocoy Bongalo